Pifasso aka lürick us schteilsiddi

Pifasso Reim-Chronologie - ausgewählte Texte 2000-2006

Geboren am 5.12.1982.
Wohnhaft in zug und st.gallen.
Nach de matura 2000, direkt is militär als kanonefuetter-füsilier. FTA forever...
2005 abschluss studium bwl an der universität st.gallen mit dem bachelor of arts, ab juli 2006 in amsterdam.
I wellem jahr er am hip hop verfalle isch weiss er nüme allzu genau, er meint es wird wohl ungefähr im ’95 gsi si…
Im 2000 jedefalls hed de pifasso – nachdem er grad es jahr im dirty south vo de USA verbracht gha hed – mit em dafri erschtmals zum mic griffe und aktiv schwiizer sprechgsang zelebriert. Imene chliine zimmer, usgrüstet mit es paar billige mikrofon und mks hend die jungs textet, freestyle sessions duregeh, mit em sampler und de groovebox experimentiert und natürlich au das grüne klebrige züüg verraucht…
Ungefähr es jahr später hed de pifasso anere party de goathill troffe und scho bald sis talent bim reime ghört – so isch en wiitere wortkünstler dezuegstosse.
Die erschte uftritt unter em name panoreima hend gfolgt, verbunde mit unvergessliche bühneerfahrige und know-how sammle in sache „mit-wievill-tequila-im-blut-chan-i-mi-no-an-verdammte-text-erinnere?“.
I dene lehr- und ereignisriche jahre hend sich eusi gliebte rapper vo panoreima kontinuierlich wiiterentwicklet. interessanti zämearbeite sind entstande – i dem sinn shout-outs a d’homes vo de ennetsee connection, freemike, passio und wicht, style miliz-söldner casp, zug massive baby!, gogi de allrounder, michi g, rico, shark austrian-style thug, cebex, hawk, ics, nsb, vali-gebucht-für-concerts-dj, ronnie mönd-mal-endli-en-beat-neh! und vieli anderi.
Sit em herbst 2004 gilt panoreima +1: Nach einige jahr abstinenz vom „musik-biz“ hed sich the one and only zuger hip hop pionier, sini eminenz remo p, em panoreima kollektiv agschlosse. En experte in sache mundart hip hop, isch er doch sit meh als 10 jahr am rappe und produziere. Sini mitriissende beats und usgfiilte text ghöred ab sofort zum panoreima inventar, prädikat 1A.
Ziit zum säge: Zug lebt, baby!!!
Mittlerwiile sind d’panoreima-künstler i ierem dritte studio iiquartiert, wo sie innerhalb vo vier monate selber baut, ufgstellt und iigrichtet hend.
Jede vo dene vier kreative denker hed konsequent au sis eigne ding in sache usbildig und beruf durezoge und so heds halt au immer mal wieder es paar kreativi pause geh, wo d’musig nöd allei im vordergrund gstande isch.
Panoreima staht für qualitäts-sprechgsang und liebi zum rap. Es staht für vier weltoffeni, hinterfragendi und völlig unterschiedlichi mcs us em zugerland, wo dur de rap ihri gedanke verarbeitet und de lüt direkt, unzensiert und ehrlich ihri asichte mitteiled.
En dank a all die wo eus unterstützed und wahre hip hop liebed.